يوم م عملت فيها .. زكى !!

أحياناَ الواحد ياخد قرارات يتخيل أنها صحيحة وتطلع فى الاّخر( طز فش )

أنا مثلاَ طقت ف دماغى فكراية ظغنونة تقع فى دائرة القرارات التى تحمل

صفة الكلمة الحمراء ..

حبيت أعمل فيها واد مفتح ومقطع السمكة وديلها .. فى أجازتى السنوية إتخبطت

ف نفوخى وقررت أسافر عن طريق البر ... طيب ( وتذكرة الطيارة ) إللى

بصرفها م الشغل .. اّه فكرة .. أروح للمكتب وأرجعها وبفلوسها أحجز ب 450

ريال للغردقة وأضرب الباقى ف جيبى ، وفى العودة أقطع تذكرة على حسابى

وبحسبة بسيطة من المخ ( إللى باين عليه فوت ) لقيتنى طالع م الحسبة كسبان

كسبان ... ماشى .

بعد سؤال الزملاء قالوا : يا راجل دى رحلة ممتعة وساهلة جداَ وجميلة ..

واحد ظريف سألنى : أنت مش بتعرف تعوم ؟ ..

أعووووم !! ... أعوم إيه يا مجنون إنتى ؟... هيه فيها عوم ...

المهم مشيت الخطة تمام التمام ورجعت التذكرة وضربت 1600 ريال فى

جيبى بعد الحجز ... وركبت الباص ... وبلاد تشيلنى وبلاد تحطنى .. وصحارى

ونوم وصحيان .. المهم وصلت لميناء ( ضباء ) .. إكتشفت إن كل المصريين

مسافرين معايا .. يا نهارأبيض.. كل دول هيركبوا المركب معايا .... ماشى برضه ..

طلعنا اللنش السريع للغردقة وفى البحر تحول اللنش إلى مرجيحة ولا مراجيح

المولد .. الموج عالى جداَ .. وكان اللنش مجهزبنظام سحب المياه أوتوماتيكيا

لملئ حوض فى المنطفة التى ترتفع ليحدث توازن ثم يفرغ المياه بالتوالى ،

وخروج المياه يحدث فرقعة جامدة .. والحريم ترجع .. والعيال تصوت ..

وكانت ( ليلة سودا )

تذكرت فيها السلام 98 قلت ياه دا السمك هياكلنى ومش هستفيد

ب ال 1600 ريال .. دى فكرة منيلة بنيلة ..

وصلنا الغردقة وكل الرحلة كوم وحكاية الغردقة وشيالين الغردقة كوم تانى ..

بلاش أحكيها علشان ده كلام يوجع البطن ..

قبل إنتهاء الأجازة ( المنيله بنيله برضه ) عملت فيها واد فاهم وخبير

( إنترنيتى ) .. دخلت موقع مصر للطيران وحجزت تذكرة ، وتانى يوم

ذهبت لمكتب الأقصرفوجدته فى حالة صيانة .. سألت قالوا المكتب الاّن

على الكورنيش أمام بنك الأسكندرية .. ماشى ..

مع إنى حافظ كورنيش الأفصر حته حته .. شبر شبر .. شجرة شجرة

.. من أيام ( الصياعة ) والتسكع والصرمحة .. إلا إنى بعد ما مشيت

نص المسافة عملت فيها مهم ووقفت تاكسى .. سألته : بكم ؟

بخمسة جنيه .. إيه يا عم خمسة جنيه إيه ؟ .. هما 3 جنيه ,, . ماشى .. إركب ..

ركبت بالضبط 13 متر .. وقاللى وصلنا .. !! .. يعنى ملحقتش أقفل الباب ..

طيب يا ولاد الحرامية ...ماشى ...

دفعت فى تذكرة عودة فقط .. بالإنجليزى ( ون واى ) مبلغ 1890 جنيه ..لأكتشف إنى لم أوفر

شيئاَ ومخدتش غيرالتعب والبهدلة ومطلعتش غيربالسلطانية

وأستاهل إللى جرالى من ورا دماغى إللى جواها ( نص كيلو بسطرمة )

هههههههههههههههه

حمد لله على سلامتك
استاذ محمد على
ومايوقع إلا الشاطر
وسلملي على البسطرمة

لا بقى انت كسبان هههههههههههههههه
عارف كسبت ايه شرف التجربه والفطن بقى اللى يستفيد من تجربتك يعنى انت بقيت كده عبره لغيرك ههههههههههههههههههههههههههههه اوعى تفهمنى صح انا قصدى بقيت عظه اللى عايز يجى بر يتعظ بيك ههههههههه يا نهار ابيض انا مش عارف اقولها بطريقه احسن من كده هى مفيش غيره اللى مش حيركب الطياره حيبقى زى ده
شكرا يا استاذ محمد على الموضوع الشيق والرحله المتعبه ونرجو المزيد مش من الرحلات المتعبه من التجارب الصعبه عشا ن نتعظ

محمد الأمير

كل الشكر لك على التعليق .. والله يسلمك

سيادة المستشار

فعلاَ هى تجربة مهمة جداَ .. وأنا كنت فدائى ليتعظ الغير بتجربتى
لكن مهما حصل فبمجرد أن تطأ قدماك مصر تزول كل المتاعب

وتوبه .. توبة عاصى إن عملتها تانى ..
تحياتى لك وتقبل مودتى وإحترامى

ههههههههههههه

عارف اللنش دا انا ركبته قبل كدا
يجيرك ربنا كنت فعلا حموت
بجد مرعب
انا فضلت نايمة لحد ما وصلنا

لايمكن تقدر تحط رجلك على الارض ولاتمشى خمسة سنتى

المهم وصلت المنتدى بالسلامة

شكرا لك اخ محمد

كل الشكر الأخت منحه على التعليق

ورعم صعوبة الرحلة إلا أنها تترك ذكرى طيبه وخاصة عند ظهور أضواء
مصر وإقتراب اللنش من الأرض وهذا الخط أيضا خدم معظم الصعايده
أو المسافرين أصحاب الاوزان العالية ..

شكرا جزيلاَ

» كلمات وألفاظ تخالف عقيدة المسلم نقع فيها بدون علم