فخرانيات الاثنين 28\12\2009

بسم الله الرحمن الرحيم

الاخوة والاخوات

سلام الله عليكم ورحمه الله وبركاته

( الانهيار الاخلاقى داخل المجتمع )

اصبحت هناك ظاهرة شديدة الخطورة وهى للاسف الانهيار الاخلاقى داخل المجتمع واصبحت القيم والمبادىء لا تمثل الركيزة الاساسية داخل المجتمع .

لاننا اصبحنا اليوم نرى امور غاية فى الغرابة .

بالامس وليس من عادتى وبمحض الصدفة كنت اتابع برنامج 90 دقيقة على قناة المحور واثيرت قضية عجبت لها من

ضمن امور كثيرة اصبحنا نعجب لها فى هذا الزمن الا وهى قضية الاميرة السعودية خلود طليقة الامير الوليد ابن طلال

وهى من ال سعود ورجل الاعمال المصرى اسمة معرفش مين الكومى رئيس نادى او اتحاد الله اعلم اية

ههههههههههههههه لانى مش ملم بعالم الكرة المهم مش دة بيت القصيد الاخ بيدعى انها لطشت منه خمسين مليون جنية

ولطشت منه مجوهرات اثناء ما كانت بايتة عندة فى فيلتة . طبعا سالوها بصفة اية انتى بايتة عندة قالت البرنسس

انه كان متزوجها عرفى لمدة ثلاث اسابيع . الاخ بيقول لا مراتى ولا اعرفها ولو معاها ما يثبت تطلعة. الاخت بتقول

كان معايا ورقة الجواز العرفى وقطعتها ولان العصمة كانت فى ايدى طلقتة بعد ثلاث اسابيع من الجواز لانه ضربنى

وشتمنى وان الفلوس الى بيدعى انها سرقتها ونصبت عليه فيها انها كانت المهر بتاعها.

طبعا انا لخصت الموضوع فى كلمتين لكنة موضوع طويل وكبران اد كدة هو زى شبسيكوا المضلع كدة وكلة يضلع نفسة .

المهم انا قعدت ادور الحقيقة فى سيل الاتهامات والفضايح وطلعت فى الاخر بنتيجة غريبة انه علشان الفلوس ممكن

واحدة اميرة من البيت المالك تنصب وتعمل الللى وتضيع سمعتها وشرفها فى مقابل ملايين يا سبحان الله هى للدرجة دى

بقت القيم والمبادىء بح والفلوس هى الاهم طيب دى اية الى ناقصها اميرة وبرنسيسة محتاجة اية علشان تشوة

سمعتها .المهم الناحية الاخرى فرد واحد مصرى يملك 50 مليون جنية . و75 مليون مش لاقيين ياكلوا عيش حاف

وطبعا دة واحدمن ضمن مجموعة من الاباطرة الكبار امثال اللورد احمد عز والكنج ابو العنين وغيرهم وغيرهم .

وفى النهاية تبص تلاقى دة كلة بيضيع على الحريم يعنى تجى واحدة وتقش ههههههههههههههههههه ودة طبعا ذكرنى

بالراحلة المبجلة سوزان تميم وهشام طلعت الاخطبوط الثانى وكنج الكنوج ههههههههههههههههههه وعمار يا مصر بجد

عمار يا مصر وفى النهاية تجد فى المنتصف ان لا فى اخلاق ولا قيم ولا مبادىء وللاسف الكبير ان العالم الصغيرة

والغلابة بردة بقت تقلد للاسف تقليد اعمى وكل واحد عاوز يدوس اخوة او يطحنة من اجل البقاء وتناسينا فى كل هذة

الزحمة ا ن فى شىء اسمة مبادىء وقيم واخلاق واصبح هؤلاء القراصنة قدوة لكل مواطن وكل واحد يقلك يلا نفسى ما

هو الكبار بينهبوا. وانا لاحظت دة فى عملى وفى قطاعات كتيرة .

طبعا هذا لا ينفى ان هناك من الشرفاء ما يجعلنا ان نقول ان الخيرمازال موجود والحمد لله .

لكن اود ان اقول لما كل هذا ؟ ومن اجل اى شىء نفعل كل هذا ؟

لان ربنا قال فى كتابه العزيز وفى السماء رزقكم وما توعدون والكثير والكثير من الايات الدالة على ان الرزق سوف

ياتى لكى يطمئن قلبك .

فلماذا نهدر مبادئنا وقيمنا من اجل امور دونياوية زائلة ؟

بجد لا يسعنى الا ان اقول عمار يا مصر وربنا يخلى الناس دى الى مشرفانا دائما على القنوات الفضائية بين الحين

والاخر بقصصها الممتعة من سوزان تميم الى قصة الاميرة خلود وما خفى كان اعظم وما هو ات اعظم واعظم .

وفى النهاية تلاقى الى بيدفع فاتورة العالم دة كلة المواطن الغلبان البسيط .فلك الله يامصر . وصباح الخيرات يا مصر.

تقبلوا تحياتى

وانتظرونى باذن الله فى فخرانيات اخرى

باذن الله الاثنين القادم ان كان فى العمر بقية

مصطفى احمد الفخرانى

السلام عليكم
أ/ مصطفى
شوف انا لفت نظرى حاجة كدا صغيرة مش الموضوع الأصلى لان دا موجود فى كل العصور والأزمان

واللى لفت نظرى مش الــ 50 مليون وبس لا لا
هو ثروته اصلا فيها كام 50 مليون علشان يستغنى عنها كدا بالساهل لاى حد حتى لو كانت أميرة ؟؟؟؟
ياعزيزى الرقم ده الفتات من مجمل ثروته
حاجة كدا زى ماتقول بعد الشر عليك مثلا اتلطشت منى 50 قرش فى الميكروباس
ههههههههههههههههه
وعاشت مصر لسه والله فيها الخير ولسة بتتنهب وياما حاتتنهب وحاتفضل برضه فيها الخير
ويجعله عامر يافخرانى

وحياتك حتى الحرامية بردة والنشالين بيشتكوا من ضيق الحال يا نفرتيتى لان العالم الصدمانة دى اية يتلطش منها وطبعا العالم الفايف ستار محدش يسرقها غير الاميرات والناس vip يعنى بردة الح رامية والنشالين بتوع الميكروباسات حضرتك زعلانين لان زباينهم كوحيتى ومش جايبين هم ما ان اتقفش ياخد له قلمين على كام لكامية ممكن يرقد فيهم سنة يعنى حتى مش هتجيب هم مصاريف العلاج والذى منه يعنى بردة النشالين مقشفرة معاهم ما هى لما بتجى بتجى على الكل يا عم نفرتيتى
ويجعل كلامنا خفيف على حضرتك بعد الليلة العفاريتى الى فاتت
هههههههههههههههههههههههه
تقبلى تحياتى وشكرا على مرورك
مصطفى

هههههههههههههههههههه
عفاريت ونشالين ولكوميات لا ياعم من خاف سلم
نبعد عن الفخرانى ونغنيله ههههههه
أشوفكم بكرة على خير
تصبحو على خير وهنا

انا اجيبلك من الاخر يا دفخرانى انت بتبص على الخمسين مليون اللى مع الراجل ده وبتقول هو معاه خمسين مليون والخمسه وسبعين مليون مش لاقيين بس انا عجبنى كلام نفرتيتى لما بتقولك زى الخمسين قرش اللى اتسرقت فى الاتوبيس صح كده لان المبلغ ده مش كل ثروته ده جزء بسيط منها وممكن يكون ده السيوله اللى فى البيت زى ما يكون انت حاطط خمسميه جنيه مصاريف كده سايله لفاتورة التليفون وكده يعنى طيب انت عارف المبلغ المعروض ديه للقديسه سوزان تميم كام ؟75000000 متعدش اصفار دول سبعمائه وخمسون مليون دولار يعنى حوالى 4000000000 متعدش برضه اربعه مليار جنيه مصرى وهو ثروته هشام طلعت 168 مليار دول حوالى كام الف يشترو كام فدان يانهار اسود ولى عوده معاك نشوف المبلغ ده ممكن يعمل ايه

بسرعة وعلى الماشى

هم مش خمسين مليون دول 150 مليون
الظاهر انك مش بتعرف تعد ذى

وديت ال100مليون فين
ال50 دول ثمن الخمس فلل يااستاذ مصطفى

ولى عودة مرة اخرى

سبحان الله يا جماعة انا بطبيعة الحال مليش فى لغة الارقام والاعداد بس فى كل الاحوال مقدرش اقول غير عمار يا مصر بجد عمار يا مصر وبردة الخير والبركة فى كبارها ومسئولينها
طب يا اخوانا مش من المفروض من الراعى انه يسرق الرعية وينهبها ههههههههههههههههه بحكم اننا بنتكلم على الاخلاق والمبادىء والذى منه .
حاجة تانى يا ريت تدوروا على واحد يخلص على زى سوزان تميم بس يكون راجل تقيل ويدى الورثة حاجه كدة حتى علشان الواحد يحس ان عملهم حاجه قبل ما يتوكل على الله واهو ياخد بيهم رحمات هههههههههههههههههههههههههههههه يقلك القتيل اقصد المرحوم سبلنا حاجه قبل ما يودع .
عموما بردة القديسة سوزان تساوى ثمنها اكتر هى بنات الناس لعبة دى بنت متربية على الغالى .وبعدين يبقى انتا اكيد فى مص يا جماعة
شكرا على مروركم جميعا
مع تقبل تحياتى
مصطفى الفخرانى

الأستاذ مصطفى
أنا مش عارف ليه وسائل الإعلام فى مصر كل واحده غنيه م السعودية
يطلقوا عليها لقب أميرة .. مين قال إن خلود العنزى أميره ..
لا هى أميرة ولا تنتمى لاّل سعود باى علاقة سوى أنها طليقة الأمير
الوليد .. لكنها ليست من اّل سعود وليست أميرة ..

شكراَ مصطفى ع الموضوع ..
أطيب أمنياتى

بارك الله فيك اخى على التوضيح لكن دة الى سمعتة اخى الفاضل
وفى كل الاحوال وليذهبوا الى الجحيم
تقبل تحياتى
مصطفى

الأستاذ مصطفى

تفتكر أميره سعودية تتجوز عرفى
يحيى الكومى ده مهما كان معاه .. عمر ما أميره سعودية تبص له ..

لكن تعودنا فى مصر من وسائل الإعلام لو واحده سعودية صدمت حد فى الشارع بالعربية
يطلع مانشيت ( أميرة سعودية تقتل شخصاَ وتهرب )

وطبعاَ تضخيم الأخبار والمبالغة بها رغبة فى التوزيع

وبرضه شكرا على الموضوع

ههههههههههههههههههه

دائما الاستاذ الجميل
مصطفى الفخراني موضوعاته جميلة
ومجبرين أن نتابعها رغم أنفنا
تقبل مني هذا المرور العابر
ومنتظرين الفخرانيات الاخرى

ههههههههههههههههههههه الاستاذ /محمد على
حضرتك محسسنى ان الاميرة دى كانت حبيبتك او طليقتك انتا مش طليقة الوليد بن طلال يا سيدى يحيى الكومى ولا غيرة مش هتفرق وبغض النظر عن جنسيتها اخى الحبيب انا كل ال حبيت اتكلم عنه قصة المبادى والقيم الى راحت بغض النظر اميرة او غفيرة بغض النظر سعودية او هندية احنا بنتكلم فى سياق موضوع رئيسى الا وهو قيم الناس ومبادئها واخدنا الموضوع كمثل ونموذج للحديث والتعليق عنه .
لكن قلى يا اخ محمد على انتا دشناوى والا سعودى لانى حاسس انك محروق خالص على الاميرة .
بس بردة احب اقلك حاجة يعنى مش دفاع عن السنكوح الاميرة بردة الى قالوا انها اميرة زى عود البوص بتاع الشامى ولا حتى فيها ريحة الحريم يعنى كلها على بعضها متوزنش 3 كجم مش عارف ايه الى عجب الوليد فيها . ازواق سبحان الله . دنيااااااااااااااااااااااااااااااااااااااااااااا
طبعا فى الزحمة ديا بردة اتقدم الى اخى الفاضل الى برحب بية وسطنا محمد الامير ابو عبد الله وبقلة نورتنا ونورت الفخرانيات وشكرا حبيبى على مرورك الكريم
تقبلوا جميعا تحياتى
مصطفى

والله يا اخوانى انا لا اتعجب الا من دنائة النفوس فكيف لرجل مثل الكومى او هشام طلعت ان تسول له نفسه وان يضيع ماله ومجده واخرته وسمعته وعائلته للحظة هوى او لشهوه شيطانيه وانا اقول شيطانيه لاننا ظلمنا الحيوانات فى هذا المجال فالانسان اذا تغلبت شهوته على عقله اصبح الحيوان خير منه وذلك لاسباب لان الحيوان غير مكلف ولان الحيوان غير عاقل ولان الحيوان غير مدرك كما ان الاهم ان الحيوان اذا عرضت عليه انثى من جنسه ونظر فيها بطريقته التى تعرفونها ووجدها حامل فانه يتعفف عنها ولا يقربها مهما كانت شهوته فها هو الحيوان فهل لو الحت على الانسان شهوته ووجد امرا فى شهرها الاخير سيتعفف عنها اذا لم يخاف الله ؟ ساترك لكم الاجابه هذا من ناحية شهوة الفرج اما شهوة البطن فمن الممكن ان نجلس سويا على مائده عند الاستاذ مصطفى الفخرانى وعليها ما لذ وطاب ثم نشبع فيمد الفخرانى يده ويقطع قطعه من الديك الرومى ويقسم لى انا صلاح رسلان ان ااكل بعد ان شبعت وامتلات معدتى او لم يقسم وقال لى جرب الحته دى فهل سارد يده بالطبع لا اما الحيوان اذا وضعت امامه البرسيم مثلا ثم شبع فاتحداك ان تستطيع ان تجعله ياكل عود واحد منه ونحن عندما نتحدث عن الشهوه نقول حيوانيه ظلما للحيوانات
وها نحن امام رجال من افضل رجال الاعمال الا وهو مثلا هشام طلعت الذى يمتلك مدينتى ويمتلك الرحاب وما ادراكم ما الرحاب ان الذى يمتلك شقه واحده من مدينة هشام يقول بكل فخر وفشخره وعجرفه انا ساكن فى الرحاب والاخ التانى الكومى رئيس النادى والمليونير الشهير ابا ورفضا ان ياكلا من اللحم الطيب وتركاه ونهشا فى اللحم الخبيث فبئس ما قدمت لهم ايديهم وبئس ما كانوا يصنعون فمن حق الرجل المسلم ان يتزوج باربعة نسوه ومن الممكن بماله ووجاهته ومنصبه وشبابه هشام طلعت طبعا ان يختار اجمل واعف وارقى اربعة بنات فى العالم الاسلامى دون معارض فهو كان حريا ان تكلم ان يسمع له وان نكح ان ينكح وان طلب ان يجاب وان دعى ان يلبى فما بالكم من رجل اتبعه الشيطان فكان من الغاويين واخلد الى الارض واتبع هواه وحسبنا الله لا اله الا هو

الف شكر يا فخرانى على الموضوع انا دلوقتى اتا عرفت سبب الضريبة بتاعة غالى

الراجل فيه الخير عاوز يجمع الفلوس دى من الشعب علشان خاطر واحد من الشعب

خسر ال 50 م مم مم مليون بس ياخى اوع تستغرب من ال م م م اصلا انا كدا كل
ما اقول مليون لسانى يقول ارجع الكلام دا مش ليك ولا لشعب مصر الغلابه اللى
زيكم انت اخرك قرش قرش قرش ولو زعلان طيب انا هرضيك جنيه جنيه
ودا اخرك معاى اوع يا عم حماده تقول انطق مليون فى الوقت الحاضر يمكن لما

جمال عبد الناصر يرجع ابقى انطق لك مليون

انت تعرف كلام فى سرك يا فخرانى قيمة صحيفة اللى انت يا غلان تعارض
فيها وتقول ان بيتك المسكين مش يحصل 500 الف بخمسين جينه
يعنى برضوكلام فى سرك اوع تقول لحد يافخرانى خلينى ارجع اشوف العيال
يعنى القيمة اللى الجماعة توقعوها من المعارضين بس مش من الضريبة
12مليون جينه من ثمن صحيفة المعارضة بس امال كام مليون ضريبة

وبلادى بلادى بلادى لكى ضريبة فى مالى واولادى

وتحياتى لك يا فخرانى

حماده الشريف

لا لا لا يا أستاذ مصطفى أنت فهمتنى غلط ، أنا أقصد وسائل الإعلام فى مصر
ولاحظها بنفسك فى كل الجرائم على إختلاف أنواعها تجد الصحف تشير إلى
الفاعل إنه أميره سعودية وهو إستهداف - فى رأيى - مقصود من قبادات هذه
الصحف العلمانيون ..
ولم أفصد موضوعك تحديداَ ... وأنا مصرى فى الأول والاّخر وغير متعصب سوى لبلدى
فقط ..
أما حكاية القيم فلن تجدها مع رجال الأعمال الحاليين .. فلو يعرفونها لما كنا فى
هكذا وضع .. لك تحياتى

انا عارف طبعا اخى الفاضل محمد على ولكن كل ما فى الامر طبعا حبيت اداعبك ليس الا وكلامى لك كان من قبيل المداعبة واعطاء روح الدعابة فى الرد واعلم طبعا انك مصرى اصيل كمان .
وانا عارف الاعلام بتاعنا من غير ما حد يقول ولا يعيد ولا داعى للكلام اصلا لان الاعلام بتاعنا موجة وكل واحد عاوز يبنى مجد للقناة بتاعتة الغرض منها الربح ليس الا ولن اقول لكم سوى الربح اما قضايا الناس التى نراها ما هى الا متاجرة بهم لانهم فى النهاية يتربحون منها ناهيك عن جزء لكى نكون منصفين كويس بردة بيقدم قضايا الغلابة وان كان بردة لا يمنع ان الشهرة له فى المقام الاول لكن بردة افضل من الاول احنا عاوزين نفضح النظام امام الراى العام وان كان النظام هههههههههههههههههههه اصبح بليد ويقولك اضرب دماغك فى اتخن حيط.
عموما اخوانى واخواتى اشكركم جميعا على مروركم الكريم ولا تنسوا عزومتى التى نوة عنها سيادة المستشار والديك الرومى والى راح يتاخر عن موعدنا ما راح يلاقى ديك رومى ولا حتى فتفوتة ديك رومى وخوصا انتى يا نفرتيتى علشان انا عارف طبعا مصدقتى ان سيادة المستشار شرط ان العزومة تكون رومى .
بس اة يا خوفى ياسيادة المستشار جماعة المنتدى بعد الديك الرومى يطمعوا فيا ويقلك كمان الفخرانى اخطبوط وزى الجماعة الى بنتكلم عليهم بس لا هما عارفين الى فيها ههههههههههههههههههههه
تقبلوا تحياتى جميعا
مصطفى

السلام عليكم

أ/ مصطفى
تصدق أنى ماأخدتش بالى خالص من الديك الرومى ده
بس طبعا البركة فيك مش معقول حاتعزمهم وتنسى أختك
وربنا يخليلنا الست أم حمادة بتاعة البيض والفرخة والديك الرومى وكل حاجة حلوة ليها ريش وبتمشى حافيية ههههههههههههههههه أو حتى بتطير أهو كله بيتاكل ويجعل بيت المحسنين عمار بكل مالذ وطاب

ههههههههههههههههههه

نفرتيتي ؟
الاستاذ مصطفى فاكر إنه محدش عارف الديك الرومي جاي من فيين ؟
لا ياباشا أخوك متتبلش في بقه فوله
ولو معايا رقم تليفون الست أم حمادة حبلغها علطول إنها تخلي بالها على السطح
وخصوصا الديك الرومي

وكمان كنت حبلغها إن في ناس منتظرة الديك الرومي على أحر من الجمر وأولهم نفرتيتي
إلا إذا 00 إلا إذا
حفظتولي نايبي معاكم

استكى يا نفرتيتى انتى مسمعتيش مش ام حمادة من يوم انفلونزا الطيور والحجات الى بتحصل د ام حمادة مهنش عليها الطيور بتاعتها تروح فى ابو نكلة راحت جابت لهم شربات وجزم شمواة علشان ميمشوش حافيين وجابت لهم على العيد الى فات هدوم ولبستهم قلتلك لا تاخدهم لطشة برد يعنى معدش ليهم ريش وبتحميهم وتغسلهم وشهم كل صبح بصابونة ديتول وبدال ما كانوا يمشوا على الارض دلوقتى بقى يطيروا بس يعنى نظام هوائى . شفتى ازاى كل دة يعنى معدتش الفراخ بتاعتها ولا الديك الرومى مطابق للمواصفات بتاعة حضرتك .
يا خسارة يا ابو عبد الله كان نفسى ادوقك رومى ملطوش وخاصة اننا داخلين على عام جديد يعنى تبل معدتك بحاجه كدة محمرة لكن بعد الى قالتة نفرتيتى كلة طلع غير مطابق .
انتظروا بقى لما نشوفلنا حتة تانى نسرقلكم منها الطلبات دى
وتقبلوا تحياتى جميعا
مصطفى

» فخرانيات الاثنين 21/12/2009
» انتظرونى ان شاءالله يوم الاثنين القادم مع فخرانيات الاثنين وموضوع المقال يناقش قضايا المنقبات فى مصر
» فخرانيات الاثنين 4/1/2010